Их Британийн цэргийн удирдлагууд кибер орон зайд учирч буй аюул заналыг эсэргүүцэхэд түлхүү анхаарч, цэрэг арми дахь танкуудаасаа татгалзах боломжийг судалж байна гэж “The Times” сонин мэдээлжээ.
Их Британийн армийн зэвсэглэлд буй “Challenger 2” загварын 227 танк болон явган цэргийн байлдааны 336 “Warrior” машиныг шинэчлэх зардал огцом нэмэгдсэн тухай мэдээлэл гарсны дараа ийм мэдээлэл цацагдсан байна. “Challenger 2” бол тус улсын армийн байлдааны гол танк юм.
Кибер хүчин чадал, сансрын болон бусад технологиудад илүү их хөрөнгө оруулах ёстой гэж Их Британийн Батлан хамгаалах яам бүр өнгөрсөн онд мэдэгдэж байв. “Бидэнд тулгарч буй шинэ аюулыг сөрөн зогсохын тулд Их Британийн аюулгүй байдлын тогтолцоог зохих ёсоор хамгаалах, батлан хамгаалахын ашиг сонирхлыг тэнцвэржүүлэх үүднээс зоригтой шийдвэр гаргах шаардлагатай байгааг бид ойлгож байна” гэж тус улсын цэргийн байгууллага мэдэгджээ.
“The Times” сонинд тэмдэглэж буйгаар, танкуудыг "хаях" санааг Пентагон, НАТО-гийн албан тушаалтнууд гаргасан байж магадгүй байна.
Одоо Их Британи хүнд хуягт техникүүдээс татгалзахтай холбоотой асуудлаар Эвслийн түншүүдийнхээ санал бодлыг тодруулж байгаа аж. Тус улс дайрагч нисэх хүчний салбарт тэргүүлэхэд гол анхаарлаа хандуулж, “Apache” загварын 50 нисдэг тэрэг, мөн түлш цэнэглэгч хүнд нисдэг тэрэг болон тагнуулын нисдэг тэргүүдийг холбоотнууддаа санал болгох төлөвтэй байна.
24news.mn